Zur Übersetzung dieses Artikels geht es hier lang: Der reisetopia.ch Wochenrückblick auf Schriftdeutsch
Au diä wusche ischs reisetopia Team wieder meh unterwägs xi und es hät vieli News us Basel, dä Schwiiz, Europa und dä Wält geh. Üsi Kategorie reiserruckt hät mitem Fabian sini Fortsetzig gfunde. Dazuä häts no vieli Guide und einigi spannendi Deals geh. Was alles i üsere Reise-Wält passiert isch, lässed ihr i üsem nüüe Wucherückblick.
D Highlights vode Wuche bi reisetopia die Schwiiz
Uber hät sehr interessanti Zahle übers Reiseverhalte vode Schwiizer im Usland, vorallem in Paris, London und New York vorgleit. Usem Bereich vode günstige (Ferie-)Airlines häts vorallem vode Lufthansa spannendi Nachrichte geh: Zerscht hät d Eurowings ihres Wachstum stoppe müässe, später hät diä Wuche d Lufthansa aber akündet Condor chaufe z welle. Ide gliche Wuche hät Miles & More d Priise für Prämieflüg um rund vier Prozänt erhät und Air Italy hät Kanada und Kaliforniä usem Winterflugplan gstriche. Bide gstrichene Ziel isches au bide spanische Airlines wiitergange. Ibera und Air Europa werdet beid ufgrund vode politische Lag nömme nach Venezuela flüge.
Diä Wuche händ üs gsperrti Flughäfe dä Schnuuf ahalte lah. In Frankfurt isch dä Flugvercheehr wägere Drohnesichtig komplett gstoppt worde, während Basel wägere Bombedrohig dä Flughafe wieder komplett sperrä hät müässe.
Es hät aber au positivs die News geh, so wird Qatar s ässe die Economy Class verbessere und d Emirates hät gnaueri Details zu ihrere Premium Economy verluute lah. Leider häts au no en truurigi Mitteilig geh. D Asiana wird Firs Class istelle. Das isch jewills eine vode attraktivschte Meile-Deals miteme sehr überzüügende Luxusprodukt ab Frankfurt xi.
Bide Guides händ mir üs bide Miles&More agluägt wie ihr trotz dä kaputte Websiite Meiletickets und Meileschnäppli buäche chönd und däbi nöd uf dä Meilepool verzichte müänd. Zuäsätzlich hämmer üs dä Silver Challenge bi Miles&More agluäged, dank dem Ihr i 30 Flüg dä Frequent Traveller Status erreiche chönd. Und wiiter hät dä Mirco üs id Wält vode HON-Circle-Member blicke lah.
Idä Wält vode Kreditcharte hämmer üs nomal Revolut agluägt, äs App wommer kei Uslandsgebühre zahle müänd. Zusätzlich hämmer üs au no das neue kostelosi Agebot vode Amrican Express agluägt: Amex Dining, mit dem Ihr tolli Vergünstigä und wiiteri Vorteil gnüsse chänd.
Bide Deals häts diä Wuche Agebot vo Radisson und dä InterContinental Hotels geh. Dänn hämmer üs au no agluäged wiä Ihr mitem SunntigsBlick undere Rätselziitig Meile sammle chönd. Und diä dänn au ilöse? Mir hettet Vorschläg! D LOT Meileschnäppli und ds Pendant vo Austrian händ mir diä Wuche vorgstellt. Bi oneworld chönd Ihr miteme Trick günstig Avios chaufe, während Flying Blue wieder günstigi Ilösige bi Air France und KLM ermöglichet.
Ihr wänd alli Deals vo dere Wuche nomal läse? Dann luäged am beste uf üsi usfüährlichi Übersicht! w
Wiiter hät üs dä Fabian diä Wuche zume reiseverrückte Roadtrip mit “Michael Schuhmacher”, eme günstige First Class Flug und eme Rennä durd Wuästi mitgnio. Däzuä häts Reviews vode Ethiopian Business Class uf dä Strecki zwüsched Dubai und Addis Abeba geh.
Und au diä Wuche isch üses Team unterwägs! Für dä Colin und dä Yannick isches vo Züri über Madrid fürs Wuchenänd nach New York gange, wo sie s Hilton Times Square teste händ chönne.
Für d Alexa und mich isches rächt unspektakulär idä erste Klasse vom düütsche ICE vo Basel nach Münche gange, natürlich hät dä Zug ä Stund Verspätig gha.
Während dä Artikel online gaht, sitzet mir die Senatoren Lounge am Flughafe Münche bevors mir idä Lufthansa Business Class wieder zrugg nach Basel gaht.
Was üch idä kommende Wuche erwartet
Nächscht Wuche flüged dä Yannick und dä Colin wieder zrugg uf Züri, dasmal mit dä British Airways und über London. Gäg ändi Wuche flügt dä Fabian mit dä Air Baltic nach Riga um det ds Weekend ds verbringe. Ich nimme üch idä nächste Usgab vo reiseverrückt mit ufen Trip quer dur Europa, wobii ich i keinere Stadt meh als siebe Stunde xi bin. Dazuä natürlich nüüi Guides, Reviews und vieles meh!
