Die Wuche hets bi reisetopia ir Schwiiz viu Nöis us dr wiite Wäut vom Reise u natürlech de einte oder angere Nöiigkeite us dr Schwiiz gäh. Näbst es paarne Mäudige vo Schwiizer Flughäfe heimer o vo Änderige vo Hotels ir Schwiiz brichtet. Was süsch no aus passiert isch, chöiter i üsem Wucherückblick läse!
D Highlights vor Wuche bi reisetopia ir Schwiiz
D News us dr Schwiiz si vo zwöi grosse Themeberiiche dominiert worde: Regionauflughäfe und Nachhautigkeit. Mir föh dä Wucherückblick mitem Thema Nachhautigkeit und ihrne viune Schwiizer Facette ah!
Wie söu Nachhautigkeit usgseh und wie cha das mitem Flugbetrieb funktioniere? E grossi Idee isch d Erhöchig vor Effiziänzt ade Flughäfe ider Schwiiz. Drzue gits aktuell es Projekt zwüsche DLR und em Flughafe Chlote, wo es Flugzüg viu liisliger glandet isch – dank optimierte Zytpünkt fürd Landeklappe und ds Absinke im Flugkorridor. D Erkenntniss us däm Projekt söu baud drzue füehre, dass Flugzüg bim Lande weniger Lärm verursache u weniger Kerosin verbruche, so dass d Umwäut gschützt wird.
Es wiiters Thema wo skyguide u dr Flughafe Züri d Effiziänz wei steigere isch z Mammutprojekt “Single European Sky”, wo d Alexa üs die Wuche bsunders detailliert vorgsteut het – für jede Luftfahrtfan e Pflichtlektüre.
Aber o zum obe erwähnte Lärm gits e neui Initiative in Züri: dank enorm erhöhte Gebühre wird e Verstoss gäge d Flugzyte plötzlech viu türer. D Airlines beklage sech aber, dass si bi viune Verspätige nid viu derfür chöi. Das Argumänt laht dr Flughafe bis iz aber zimlech chaut.
Bide Regionauflughäfe ir Schwiiz gits in Lugano sehr liideschaftlechi Versüech d Bevölkerig zur Ungerstützig vom Flugplatz z motiviere u so hets exklusivi Blicke hinger d Kulisse gäh. Amene andere Regionauflughafe gits derfür e grossi Freud: Dr Flughafe St.Moritz/Samedan söu usbout wärde u dermit über 60 Prozänt meh Flüg chönne abwickle. Was sech derbi wird verändere, hets hüt ide News gäh.
Zwöi wiiteri spannendi Luftfahrt-News für d Schwiiz hets die Wuche o gäh! D Swiss bechunnt ihri nächste Boeing 777 u wird derfür sehr viu nöis Personau isteue. Zwüsche 300 und 700 neui Jobs söus dank de zwöi nöie Jets gäh.
Aber o mit chlinere Flugzüg hets gueti Nöigkeite gäh! Ab Friedrichshafen am Bodesee gits e neui Strecki mitem chline Dornier-Jet im Design vo British Airways. Z neue Ziu: Toulouse.
Für Reisendi wo lieber am Bode blybe gits o spannendi Nöigkeite! D SBB het die Wuche nähmlech d Usschribig für ds neue Projekt “WOW” gstartet i derbi interessanti Iiblicke i Zuekunft vode Schwiizer Bahnhöf gäh!
Us Basu beziehigswiis Frankriich gits gueti Nachrichte! Gault-Millau het ds Les Trois Rois zum Hotel vom Jahr 2020 erklärt. Wär das Hotel mau säuber wett erläbe, u vode höche Zimmerpriise nid abgschreckt isch, cha das Hotel mit Vorteile über reisetopia Hotels bueche.
Zum Abschluss vor Wuche het üs no e erschreckendi Botschaft erreicht. Ds Schwiizer Online-Reisebüro Amoma het Insolvenz agmäudet. Was für Reisendi mit Reservierige z beachte isch, heimer für öich zämegfasst.
Us dr Wäut vode Deals hets die Wuche o wieder diverses, vor auem bide Hotels z brichte gäh!
Bi Hyatt gits aktuell e Aktion woder grad drüfach Pünkt sammlet. Lieber Pünkt ilöse? De bechömet dir aktuell 25 Prozänt vode iglöste Pünkt wieder zrügg!
Doch lieber Hilton? Dert chöiter aktuell Pünkt mit 100 Prozänt Bonus choufe! Oder faus dir lieber weit Pünkt sammle: bim Conrad in Portugal chöiter die vierti Nacht Gratis verbringe!
O wes kes Egg Benedict für üse Haub-Italiäner het gäh, würd är ir italiänische Houptstadt wieder dert übernachte.
Hesch Inträsse amene angere Review vo üs? Uf üsere Übersichtssiite gits aui Reviews!
Üses reisetopia.ch Team isch wieder ir Wäut ungerwägs gsy!
Die Wuche hei d Alexa u dr Alex am Mittelmeer agfange. Ider marokkanische Stadt Tangier hei die beide nach langer Zyt wieder mau chly chönne Entspanne und ohni Hektit chly Zyt ider Stadt im Hilotn Al Houara Resort & Spa verbracht. Trotz Spure vom “Afangsbetrieb” het ds Hotel die beide chönne überzüge u si hei d Rueh, d Sunne uder Privat-Strand i voue Züg chönne gniesse.
Nach drü Nächt ischs aber o scho wieder zrügg i die herti Realität gange – mitemne Zwüschestopp in Madrid! Rächt spontan heisi entschide ines Upgrade id Iberia Business Class für ihre Flug nach Züri z investiere, für aus Statuslose im oneworld-Imperium d Lounge vor Airline chönne z bsueche u dr Layover somit absiits vode überfüllte Priority Pass Lounges besser chönne z nütze.
Chum si die beide zrügg gsy vo Madrid, isch dr Alex zäme mitem Moritz us Dütschland churz uf Züri, wosi nach eigete Ussage nachemne steiel Ufstieg mitemne ungloubleche Usblick übere Zürisee si belohnt worde:
Zrügg in Basel het d Alexa a witere Artikel gschaffte u die letzte Vorbereitige füre Semesterstart vor Uni troffe. Trotz dr gschäftige Stimmig hets immer wieder mau fürne Usblick über d Stadt vom Münster oder dr einte oder angere Gratis Bootsfahrt übere Rhii glängt.
Füre Luca bedüütet si Ufenthalt im Conrad Bali glychzittig o dr Abschied vo Indonesie. Das heisst aber no lang nid, dass si Asie Trip somit fertig isch. Mitti Wuche ischer vom indonesische Partymekka i Richtiig Malaysia gfloge, woner sich uf dr Insle Langkawi es paar ruhigeri Täg het erhofft. Dr rund drüüstündig Flug id Houptstadt Kuala Lumpur und em eistündige Flug uf d Urloubsinsu isch vo Malaysian Airlines düregfüehrt worde. Dert het dr Luca d Langstrecke Business-Class vor agschlagene Fluggseuschaft chönne teste u isch durchus positiv überrascht worde.
In Langkawi heter z sensationelle The Andaman Resort buechet wo zur Luxury Collection ghört. Natürlech heter dank dr Buechig über reisetopia Hotels zahlrichi Vorteil becho. Nachdäm entspannte Ufenthaut und emene Abstächer i Urwald isch är wieder zrügg id Houptstadt Kuala Lumpur gfloge, wo zum Ändi vo sire Reis no chly Sightseeing ufem Programm steit. Soviu scho mau vorne wäg: Es isch sehr heiss dert, obwou me d Sunne wäge dr dicke Smogglogge chum gseht!
Was Euch ir nächste Wuche erwartet
Ir nächste Wuche heimer wieder einiges a früsche News us dr Wäut vode Hotels, Airlines und vom Reise generell für öich vorbereitet. Drunger o es nöis Review vom Colin us Los Angeles. Aber o üses Team isch nächst Wuche wiedder ungerwägs!
Nach diverse Flugreisene geits füre Alex nächst Wuche wieder mitem Zug rund ume Bodesee. Dr Trip wird aber weni spektakulär si, aber d Meetings wo dermit verbunde si chöi durchuus interessant wärde.
Füre Fabian geits am Donnschti uf Argentinie. Mit British Airways geits vo Mailand über London nach Buenos Aires. Nach paar Täg ir argentinische Houptstadt geits für ihn und e Kolleg när wiiter nach Mendoza, wo die beide am Schwiizer Wii- und Fleischproduzänt Dieter Meier e Bsuech uf sire Farm wärde abstatte.
D Linda flügt am Mittwuch via Kopehage u San Francisco nach Oahu. Si verbringt mit dr Familie 6 Täg a dr North Shore. Näbem Surfe stöh Yoga und die weniger touristischi Nordküste vor Houptinsle vo Hawaii ufem Programm.
Dr Luca gniesst no die letzte Täg in Kuala Lumpur bi Sightseeing und Chille am Hotelpool. Derfür heter grad mehreri Hotels usgsuecht: zmingst die beide Hiltons heter scho buechet, mit dr auerletzte Nacht warter er no ab, wöus öppis ganz bsunderigs söu wärde. Am Zischti geits für ihm mit Malaysian Airlines mitmne rund eistündige Flug (ir A330!) nach Singapur, woner mit viu Freud undere Portion Balik Lachs ider Swiss First Class nach Züri zrüggreise wird.
I wirde am Mittwuch ganz unspektakulär u sit langer Zyt wieder mau mit Easyjet nach Porto flüge. Dört si nid öppe Ferie oder Sightseeing plant, viumeh geits wieder mau um (zmigst us mire Sicht) die wichtigste Näbesach vor Wäut: em Fuessbau. Nach zwöi Nächt geits am Friti bereits wieder zrügg uf Gänf.
Und wie immer erwarte Euch vieli spannendi Guides, interessanti Revies und attraktivi Deals bi reisetopia ir Schwiiz!
