I de vergangene Woche hämmer Kurztrips, Mittelstrecke ond dezue au no en extremi Langstrecki em Team gha. Dezue: Streik, Airline-Insolvenz ond wichtigi Entscheidige us de Politik. Alles devo i eusem kreative Wocherückblick.

D Highlights vode Woche bi reisetopia ide Schwiz

Us de Wält vode Flogproblem hämmer vo zwoi unglückliche Flög us de Schwiz müesse brichte. D Lufthansa mues kurioser wis die letzti Reihe vode A320neo leer loh. Dezue gets us Genf witeri Folge vom Korruptionsfall rund om d Flughafesicherheit. D Alexa het erscht grad no vode positive Entwicklig im ond om de Floghafe Genf brichtet.

Swiss Senator Lounge Genf 1

Us England gets Nachrichte wo Genf, Basel ond Züri beträffe: alli drü Floghäfe selle vo Virgin Atlantic is Streckenetz ufgnoh werde – und dezue no 81 witeri Ziel weltwit! Vom EuroAirport het de Mirco es paar Details vomene akündete Sitzstreik brichtet, wo de Flugbetrieb sell lahm legge. Nome Züri schin vode negative Nachrichte die Woche verschon blibe z sih, det hets nämmli nome öbernes neus italienischs Restaurant z brichte geh,.

Usem Huus Swiss gets en neui Idee: D Streifekarte förs Flüge. Mer händ eus das gnauer agluegt. 

Swiss Flightpass Destinationen Genf Screenshot Website
Spannendi Ziel im Swiss Flightpass. © Swiss Screenshot

Aber au us de Wält vode Streiks hets leider die Woche gnue News geh: En Streik bi British Airways (wo mittlerwile abgseit worde esch), dezue en Streik bem Bodepersonal in Amsterdam. Beidi Aktione händ eus chorz de Atem graubt.

D Insolvenze vode Airlines göhnd i die nöchst Rondi; nachdem Aigle Azur wahrschindlech liquidiert wird hets jetzt au Thomas Cook ond demet Condor verwötscht; d Airline het de Schutz vor US-Gläubiger beatreit. Die Woche esch denn au no d Air Namibia dezue cho, wo bereits formell d Insolvenz agemldet het ond ehri A319 mues am Bode loh. D XL Airways verchauft kei Tickets meh ond stricht Flög – genau wie d Aigle Azur stoht au sie direkt vorem komplette Grounding.

Air Namibia Grounding Insolvenz

Us Bärn hets die Woche weder  emol en Hiobsbotschaft geh: während am Mäntig öber d CO2 Bestürig abgstimmt wird het de Nationalrot bereits anere FLugticketabgab zuegstimmt – au wenn no unklar esch was da nach de Abstimmig am Mäntig bedüte wird.

Einigi News us dere Woche händs ned i die Öbersicht gschafft. Du chasch sie aber schnell ond eifach i eusere separate News-Überischt go aluege.

Us de Wält vode Deals händ mer die Woche öppis us de Hotel-Programm bi Marriot sowie Shangri-La för euch gha. Bi Marriot gets günstigi Pönkt z chaufe, während bi Shangri-La sogar kostelosi Nächt dank reisetopia Hotels uf euch warte! 

Tyo Ritz Carlton Tokyo 08

För Meilejäger bi Miles&More gets dank Sixt 2’500 Meile. Avios vo British Airways gets momentan au grad miteme Bonus z chaufe. Ond denn no en chli exotischere Deal: met 145 Prozent Bonus ond om 30 Prozent reduzierte Meiletickets löhnd sech bi Avianca Lifemiles grad onglaublechi Deals boue!

Wenns oms ilöse vo Meile goht send ned nome d “Meileschnäppli” vo Avianca sehr asprechend gsi, sondern au s Pendant vo Singapore Airlines. Met chli Glöck chönnt ehr nämmli demet vo Düsseldorf bes nach Australie zo wesentlech tüfere Prise flüge.

Ehr wännd alli Deals us de letschte Woche nomol läse? De lueget bi eusere usfüehrleche Übersicht verbi.

Bi de Reviews chani euch vor allem mis eigete Review vo de KAL Lounge in Los Angeles as Härz lege. D Lounge esch Teil vom Priority Pass Netzwerk ond somet för velli vo euch zuegänglech – au esch sie eini vode beschte Priority Pass Lounges i de USA, gemäss em wohl bekanntischte Blogger dört.

KAL Koren Air Lounge LAX Priority Pass 3 KAL Koren Air Lounge LAX Priority Pass 20

Alli witere Reviews gets natürli wie immer uf eusere Öberischtssite z finde!

Die Woche hets i eusem Team en starchi West-Tendenz geh. Nome de Alex esch nacht Oste greist, ond het debi för einisch sogar de chörzischti Flog vo allne gha.

http://www.gcmap.com/mapui?P=ZRH-MUC;+ZRH-CPH-SFO-HNL;+ZRH-GRU;+GVA-OPO&MS=bm&PM=b:disc4&DU=mi
© gcmap.com

Nacheme chorze Bsuech in Münche met es paar interessante Meeteings, esches före Alex zrogg uf Basel gange. Nach 36 Stund onderwägs met rond 11 Stunde ICE-Fahrt weder i sis eigete Auto z steige sig denn doch jedes mol es komischs Gfüehl.

De Fabian het sin Korztrip onderem Motto Steak & Wine nach Argentinie gstartet. Vo Mailand esches öber London nach Buenos Aires gange. Det erkundet er das Wochenend chli d Hauptstadt vo Argentinie ond suecht nachem beschte Steak ide Stadt.

Fabian Wochenrückblick Argentinien Flagge

D Linda esch spöter als erwartet uf Oahu acho. Nachdem de Flog vo Zöri nach Kopehage no pönktlech gsi esch, het sech de Abflug in Kopehage um öberne Stond verspötet. De Grond esch gsi, das de Pilot us Stockholm wägeme Vogelschlag meteme spötere ond au bereits verspötete Flog acho isch. De Aschlossflog uf Hawaii het denn nome chorz nach de Landing in San Francisco ohni d Linda ond ehri Familie abghobe. De Rest vode Familie esch ufe nöchsti Flog ombuechet worde, d Linda voerst nome uf d Warteliste gestzt worde. Zom guete Glöck händ sie schlossändli doch no alli zäme als Familie chönne witerreise. Jetzt erhole sie sech bi Sonne, Strand ond wonderschönem Meer vo de lange Areis.

Linda Hawaii Strand Sonne Wochenrückblick Plmen 1 Linda Hawaii Strand Sonne Wochenrückblick Plmen 2

För de Mirco esch es am Mittwoch met EasyJet vo Genf nach Porto gange. Au wenn er nome knappi 48 Stonde i de portugisische Metropole verbrocht het, chan er die wonderschöni Stadt nome empfehle z bsueche. Öbernachtet het er met es paar Kollege imene Airbnb wo doch sehr guet usgstattet gsi esch.

Es euch nöchst Woche so erwartet

Nöchst Woche hämmer weder usgwählti Guides ond neui Reviews för euch, onter anderem d Senator Lounge in Genf. Dezue göhnd d Reise i eusem Team witer.

Före Fabion gohts jetzt no chli witer if sim Kurztrip. Nach Buenos Aires stoht Mendoza ufem Programm. En Wiitour ond de Bsuech ufem Dieter Meier sim bekannte Wine-Estate stöhnd ebefalls uf sim Plan. m Mettwoch gohts denn bereits weder öber Madrid zrogg uf Mailand, im neue A350. Hoffe düend sie ufene pönktelchi Akunft am Fritig in Zöri.

D Linda flügt nöchst Woche au bereits weder witer, met de Mokulele Airlines via Molokai nach Maui, wo en Vulkan, guets Ässe, schöni Stränd ond es Wiedersehe metere guete Fröndin warte.

Am Dsischtig ziehts de Mirco scho weder nach Portugal. Met de TAP gohts zerscht vo Genf uf Lissabon. Dört het er e Stop vo rond 8 Stonde för chli Sightseeing ond s teste vode Lounge bevors denn witer goht uf Faro. Det chan er denn chli meh als en Woche Ferie am Meer gnüsse, währends bi eus ide Schwiz wohl Emmer chälter wird.

Ond dezue gets natürli weder fröschi News, spannendi Guides ond neui Deals för euch.

Ziehts au euch nomol is Usland de Herbst? Denn teilet doch euche spannendi Reiseplan met eus ide Kommentär. 

Lust auf mehr reisetopia Artikel? Dann folgt uns:

Autor

Von klein auf bereiste Colin die Welt, angefangen bei seinem ersten Flug nach Australien mit etwas mehr als einem Jahr. Das Reisen wurde ihm sozusagen in die Wiege gelegt. Reisen wurde zu seinem grössten Hobby. Dank immer neuen Tricks kann er nun auch regelmässig in der Business Class weitere Teile der weiten Welt erkunden. Die Tricks und seine Erfahrungen teilt er gerne auf reisetopia.

Fragen? In der reisetopia Club Lounge auf Facebook beantworten wir Eure Fragen.