Hier geht’s zur Schriftdeutschen Übersetzung
En neui Woche met vellne Deals, Guides, Reviews ond spannende News! Dezue chöme neui Reise innerhalb Europas ond en neui Tripreport. Das alles ond velles meh gets i eusem reisetopia.ch Wocherückblick.
D Highlights vode Woche bi reisetopia ide Schwiz
Die Wiche sind enorm vell Entscheidige i de Schwiz gfalle ond d Nachrichte händ sech regelrecht öberschlage. I de Schwiz händ eus vor allem Neuigkeite rund ome Floghafe in Züri beschäftigt: Zerscht het Sichuan Airlines de Flog vo Züri öber Prag nach Chengdu igstellt. Gäge Endi vode Woche het de Floghafe vier neui Restaurants vode Ketti Pret A Manger eröffnet.
Zuesätzlech händ mer eus die aktuelli Lag vode Roaminggebühre ide Schwiz gnauer agluegt. Aber ned nor d Roaming-Situation het en Optimierig nötig, damet d Schwiz för Flogreisendi interessant blibt: d Floghäfe i de Schwiz händ Optimierige nötig om effiziänter met de Flög chönne omzgoh.
Aber genau die Optimierig werd schwerig, nachdem d Schwizer Loftsecherig met massive Vertrouensproblem z kämpfe het, nachdem en Floglotse verurteilt worde esch. Vell Floglotse händ sech nämmli jetzt chrank gmeldet ond so esches zo Verspötige em Schwizer Loftruum cho.
Es Thema wo aktuell bsonders de Floghafe in Basel chönnt betreffe: Frankrich planet en Öko-Abgab för alli Flög vo oder nach Frankrich.
Die wichtigsti Nachrecht för Meilesammler in Europa esch de neu igfüehrti Meiletransfer vo Miles & More gsi, wos euch ermöglecht für 1.11 Rappe pro Meile Pönkt vo euchem Miles & More Konto ufenes anders z überträge. Aber vo de Lufthansa hets leider au schlechti Nachrichte geh: D Catering-Tochter LSG kämpft met Personalengpäss ond dronder lidet d Verpflegig em Flüger.
In Europa gets Nachrichte vo Air France ond KLM: die beide Airlines wännd jetzt onderenand Bstellige vo könftige Flogzüg ustusche, je nachdem wo d Maschine grad besser igsetzt chönne wärde. Em Bereich vode Bstellige gets au russischi Neuigkeite vo Aeroflot, denn em neue Airbus A350 wännd d Russe en neui Business Class ifüehre.
För Reisendi nach Russland us de Schwiz gets witeri gueti Nachrichte, denn s Land wett ab 2021 es elektronischs Visum abiete – komplett ohni Isände vode Päss oder en Bsuech em Konsulat.
Bide nordamerikanische Airlines wo nach Basel ond Züri flüge, gets paar Neuerige: Bide Air Transat goht d Öbernahm dor d Air Canada witer ond Delta verbesseret s Catering ide Economy ufem Flog nach Züri.
Ide Wält vode Hotels gets es paar tolli neui Aktione zom Sammle vo Pönkt ond Meile! Bi Airbnb chönnet ehr jetzt Avios sammle ond bi Marriot gets neu personalisierti Aktione.
För d Fans vode Intercontinental Hotels gets en neue Deal zom Chauf vo IHG Pönkt! Demet chönnd ehr enorm gönstig ide Hotels vode Intercontinental Hotel Group (IHG) öbernachte.
Nachdem ehr denne im Hotel öbernachtet händ chönnet ehr dank de aktuelle Aktion vo HolidayCheck bes zo 2’200 Miles and More Meile kostelos ond met wenig Ufwand sammle. Nome idem ehr euchi Idröck vom Hotel met andere teilet.
Bem Ilöse vode Meile ond Pönkt händ mer euch d Aktion zo vergönstigte Prämietickets bi Air France ond KLM vorgstellt. Alli Ziel ond Details vode aktuelle Usgab händ mer för euch zämegfasst.
Wännd ehr alli Deals us dere Woche nomol aluege? Denn lueget am beschte i eusere Öbersicht verbie!
De Mirco het eus uf sini idröcklechi Reis quer dor Europa meteme Mini Cooper metgnoh. Was er zwösche Sportevents ond Täg am Meer erlebt het, het er för eus imene Tripreport zämegfasst.
Uf de Zielgerade zode Sommerferie händ mer weder eusi neue Reiseerfahrige usem Usland gsammlet. Die Woche met debi: Dütschland, Ungarn ond d USA.
Nach einige Täg in Münche isches füre Alex ond d Alexa zrogg nach Basel gange. Am Fritigobe send sie scho weder nach Ungarn ufbroche, wo die beide zerscht s Hilton Garden Inn ond aschlüssend s absolut geniale Parisi Udvar Hotel vode Hyatt Groppe teschtet händ. En Kontrast wiener chum hätti chönne grösser sih, au wenn die beide Hotels i ehrem jewilige Segmet öberzügt hännd.
För mech het d Woche in Las Vegas gstartet, vo wo us au mini zwoi wöchigi Reis dor de Weste vode USA los gange esch. Vo Las Vegas us esches witer zom erschte Nationalpark gange, de atemberaubendi Bryce Canyon.
Meteme Mietauto, wo wahrschindli ide Schwiz scho fascht als Lastwage wörd doregoh, reis i jetzt während denne zwoi Woche entlang de verschedene Nationalparks ond gnüsse debi die wonderschöne Landschaftsbelder.
Was euch ide nöchste Woche erwartet
Au ide nöchste Woche händ mer weder spannendi Inhalt för euch vorbereitet. Näbet mim reiseverröckte Trip nach Amsterdam ondeme Review vode Star Alliance Lounge am Floghafe dört, händ mer no es Review vom Alex zo eim vo de Hotels wo er zäme met de Alexa in Budapest bsuecht het. Dezue het er die nöchsti Usgab vo “booked” zom kommende Trip in Asie för euch vorbereitet! De Mirco het neui Guides för eusi gschätzte Schwizer Läser ufbereitet ond dezue gets velles a spannende News us de Wält vode Airlines, Hotels ond vom Reise.
Aber au nöchschti Woche sammle mer witerhin spannendi Idröck för euch. So gohts nämmli för mech witer uf mim chline Roadtrip dor d Bondesstaate Utah, Nevada, Arizona ond Kalifornie. I werde au witerhin de Speicher vo mim Handy met vellne wonderschöne Bilder fölle ond die letzte Täg i dem wonderbare Land gnüsse.
Gäge Ändi vode Woche gohts för mech denn au scho weder zrogg id Schwiz. De Flog vo Los Angeles nach Züri dörfi metere Boeing 777 vode Swiss flüge.
Nachem Trip nach Budapest gohts au för d Alexa ond de Alex weder zrogg id Heimat, au wenn de Alex chorz drufab grad weder i Richtig Dütschland werd flüge.
Wo verbrenget ehr euchi Sommerferie? Händ ehr spannendi Flög met Meile buechet oder wie de Alex ond d Alexa euches Hotel met Pönkt zahlt?
