De reisetopia Wocheröckblick

D Woche bi reisetopia i der Schwiz esch för euses Team en bsonderi gsi, de Alex het nämmli d Ostertäg gmeinsam metem Team us Dütschland in Berlin verbrocht – De Colin ond d Linda händ ehri Fiirtige ebefalls ide Ferie verbrocht. Was sösch no passiert esch ond welli spannende News ond Deal es die Woche geh het, zeige mer euch gärn weder i eusem neue Wocheröckblick.

D Highlights vode Woche bi reisetopia ide Schwiz

Ide zwoite Woche vo reisetopia Schwiz händ mer grad es paar Hiobsbotschafte becho: D Lufthansa het en gnaueri Prüefig vom Gepäck aköndet, was ich am Fritig in Frankfurt a mim eigete Leib ha müesse erlebe. Die indischi Fluggsellschaft Jet Airways het de Flugbetrib igstellt – met ongwösser Zuekonft. Mer händ hender d Kulisse vode Namensgäbig bi Edelweiss Air ond id Plän för d Zuekonft bi EasyJet Switzerland chönne blicke.

Zuesätzlech händ d Hotel- ond Meileprogramm sech en Wettstrit bim Punktechauf glieferet: Nachdem Alaska Airlines en Sale zom Meilechauf gstartet het, hets au no Punkte-Sales bi Radisson, Hilton und Marriott geh. Wer en Ufenthalt bi einere vo dene Kettene planet sett die Deals uf jede Fall gnauer aluege.

De Alex het sech uf de Wäg zom reisetopia Meeting in Berlin gmacht, Dank de Osterferie het er debi chli kreativ müesse werde: metem Auto esches uf Frankfurt gange und nacheme korze Stop i de Lufthansa Business Lounge bi B24, dank de American Express Platinum, esches met de Lufthansa imene korze Flog i die dütschi Hauptstadt gange.

Det esches is Grand Hyatt Berlin gange ond det, dank de Hyatt Privé Vorteil, au ohni Status ines Zimmer im obere Stock mit Zuegang zode Lounge ond witere Vorteil.

De Colin het nach sinere Reis öber Frankfurt ond Istanbul nach Antalya det en Woche Ferie bi (meist) sonnigem Wätter chönne gnüsse. Debi het er euch scho bereits vo sine erschte Idröck zom neue Floghafe in Istanbul wie au sin Erfahrigsbricht zor neue Domestic Lounge vo Turkish Airlines metteilt.

D Linda het sich, ufgrond vode höche Prise öber d Osterferie, för en Kurztrip met de Familie a Blausee entschede. Onder de Woche es tolls Usflogsziel, am Wochenend bi schönem Wetter eher z mide, do emmer meh Bsuecher gfalle a de körzlech aufgwertete Alag ond em dezueghörige Hotel fende. Obwohl s Pris-Leistigs-Verhältnis grondsätzlich stimmt, loht de Service a sonnige ond guet bsuechte Täg denn doch eher z wönsche öbrig. Grad im Restaurant mues mer met längere Wartezite rächne.

Was euch ide nöchste Woche erwartet

Nöchst Woche wird eus de Mirco uf sini reiseverrückti Heimreis vo de britische Insle metneh. De Colin wird eus witerei Idröck vom neue Floghafe in Istanbul metbrenge, das mol met Flogrichtig zrogg i Weste. So chonnt er das mol i Gnoss vo de Business Lounge för internationali Abflög, die Lounge wo die wohl beschti Business Lounge Europas vom “alte” Atatürk Floghafe abglöst het.

De Yannick wird eus vo sine Ferie in Dubai brichte, während de Fabian sini Idröck usere ganz spezielle Lounge in Züri met eus teile werd. De Mirco esch die nöchschti Woche nacheme korze Zwöschetop in Avignon ufeme Kurztrip in Katalonie rund om Barcelona onterwegs. Ich selber verbrenge no en Nacht in Berlin on reise am Mentig zrogg nach Basel, währends am Dsischtig scho weder uf München goht.