E Wuche mit viele Highlights geit langsam z Änd! Mir hei viu spannendi News, intressanti Entwicklige gha u üses Team isch viu unterwägs gsy. Das aues gits i üsem reisetopia.ch Wucherückblick!
D Highlights vor Wuche bi reisetopia ir Schwiiz
Swiss Meileschnäppli uf dr Langstrecki? Das isch sicher die grösschti Nöigkeit vo dere Wuche!Swiss Meilenschnäppchen auf der Langstrecke? Das war sicher die grösste Neuigkeit dieser Woche! D Airline het akündet Ziel ab Züri azbiete.
Wiiteri News us dr Schwiiz: Vode Schine het d’ Linda neui vegani Optione für d’ Gäst vode SBB Restaurants mitbracht. Drzue het si sech Zahle vo Interrail agluegt: d’ Schwiizer si Spitzeriiter! Vor Alex het die Wuche Neuigkeite zur Kontroue und Erneuerig vo diverse Wage, nachdäm die grossi Problem mit de Türe hei gha u d Behörde iz hei müesse düregriffe.
Us dr Umwelt- und Nachhautigkeitskategorie hets Neus vo myclimate und Miles&More, ab iz chöi o Meile für d’ CO2 Kompensation igsetzt wärde.
D’ Alexa het üs drzue es Gägebispiiel usem Südtirol vorgsteut: schiinbar isch dr Scheich vo Qatar im Naturschutzgebiet vor Region z Gast u flügt derby quer düre gschützt Luftruum mit diverse Helikopter. Dä Awohner gfaut das gar nid!
Aber o us dr grössere Luftfahrt ir Schwiiz gits wiiteri Neuigkeite: D’Strecki Genf – Paris isch fescht i der Hand vo Air France – zmingst was CDG ageit. Iz lege d Franzose nache u spiegle dr EasyJet Flug von Genf nach Orly.
Z’ Italie gits am Flughafe Malpensa e wundervoui Lounge, wo dr Luca scho het chönne gniesse. Leider isch die aktuell nid für Inhaber vom Frequent Traveller Status zuegänglech. Wieso das so isch, het d’ Alexa recherchiert!
Uf dr Strecki zwüsche Züri u Nordamerika wirds bide Edelweiss Flüg änger: nach diverse Problem het d’ Ferie-Airline einigi Flüg gstiche. D’ Gäst si uf Swiss und United Flüg umbuechet worde.
Drzue hets aber o positivi Nachrichte vore Schwiizer Airline gäh: Helvetic wird im Oktober dr erst E190-E2 Jet nach Europa überfüehre u ds neue Flugzüüg gseht ufem Papier und de Bilder enorm guet us!
Us dr Wäut vode Deals si die Wuche, wie eigetlech immer am Ändi vom Monet sehr viu Deals abgloffe. Aktuell louft no die früschi Hilton Honors Aktion, mit dere chöiter bis zu drüfach Pünkt bi jedem Ufenthaut sammle! Drzue louft bi de Hyatt Hotels d Aktion, woder e Freinacht bechömet. O das isch e enorm spannende Deal.
Dir weit aui Deals vo dere Wuche nomau läse? De lueget am beschte uf üsi usfüehrlechi Übersicht!
I dere Wuche isch o üses Team wieder viu unterwägs gsy!
Für d’ Alexa und Alex ischs zersch uf Hamburg gange, wo si sech mitem Team vo reisetopia.de troffe hei u dert di gmeinsami Vorbereitig vor reisetopia Fastlane gfiiret hei! Aschliessend si die zwöi uf Brüssel, wosi d Lounge es paar Stung hei chönne gniesse, bevor dr Alex mitere spanische CRJ-900 mitere britische Creww nach Basel isch gfloge. Für d’ Alexa ischs nach Budapest gange, wosi ufem Wäg es kurioses Flugzüüg het dörfe erläbe:
Caption: Flugnummer und Ticket von Brussels Airlines, Flugzeug von Czech Airlines, Logo von Eurowings drauf und Crew auch in Uniformen der Eurowings.
Statt d’ Hauptstadt vo Ungarn z erkunnde, isch si uf däm Trip dür verschiedeni Städt am Balaton und zumene Määrlischloss in Székesfehérvàr. Das isch ds Läbeswärch vom Architekt und Hochschuellehrer Jenö Bory, wo 40 Jahr lang i syne Summerferie bi zu sim Tod 1963 dran gschaffet het.
Nach es paar Täg ir ungarische Hauptstadt isches für Sie uf Münche, wo langsam aber sicher d Volksfestsaison afaht.
Währenddäm dä Biitrag online geit, sitzt dr Alex grad am Flughafe z Münche, nachmene weni spektakuläre Flug mit dr Lufthansa vo Basel nach Bayern.
Dr Colin u dr Yannick hei ihri Reis uf Bali fortgsetzt. Afangs Wuche si di beide is Hilton Bali Resort, wo si es paar Täg z Resort Feeling hei chönne gniesse.
När si die beide wiiter i richtig Norde vo Bali, ,wo dr Tourismus nonid so richtig isch acho. Dert heisi uf zahlriiche Usflüg dr nördlech Teil vor Insle lehre kenne.
Tempelbsüech, wunderschöni Wasserfäu, heissi Quelle u wunderbars asiatischs Ässe si ufem Plan gstande. Die beide si bis iz sehr begeisteret u freue sech ihri Iidrück vo dere Reis sho gly i Form vo Reviews und emene spannende Trip Report mit öich z teile.
Füre Fabian ischs nach sim Churztrip uf Hong Kong u China wieder zrügg id Schwiiz gange. Bim Rückflug heter d Swiss First nümm für sich allei gha, u het d no vier wiiteri Persone uf däm Super Boardprodukt gha. Derfür heter nach eigete Ussage, ds beschte Ässe ir Luft chönne gniesse woner jemaus het gha. Es het Saucisson Vaudoise mit Linse u Lauchgmües gäh. Nach vier Täg Asia-Food e wunderbari Abwächslig.
Dr Luca het sech vode Reiseplän vode reisetopia-Kollege Colin u Yannick la inspiriere u isch über Umwege mittlerwile o uf Bali acho. Vo Stockholm us het er e Swiss Business Deal buechet, u isch über Züri relativ günstig uf Singapur gfloge. Aschliessend isches mit Garuda Indonesia ir Economy Class nach Jakarta gange wo chly Sightseeing isch agstande.
Ei Tag später ischs wiederum mit dr indonesische Staatsairline imene lääre Airbus A330 nach Bali gange. Iz stöh es paar erhousami Täg ah, wo gnau weiss er aber nonid.
Was Euch ir kommende Wuche erwartet
Nächst Wuche luegt dr Yannick die verschiedene Wäg zum Star Alliance Gold Status ah. Unter anderem dr Wäg über d’ American Express Platinum Charte wo är säuber gwäut het, am Fabian si Senator, und am Alex si Wäg über Aegan Miles+Bonus isch mit derby!
Wiiterhin gits nächst Wuche die neue Meileschnäppli vor Lufthansa unud Austrian, womer mit grosser Spannig erwarte!
Dr reiseverruckt Summer im Schwiizer reisetopia Team geit aber o wiiter. D’ Alexa u dr Alex wärde die ganzi Wuche in Münche mit Familiefest u Volksfest ir bayrische Stadt verbringe. Am Wuchenend geits für die beide zrügg id Schwiiz wosi aber när am Sunnti diräkt wieder ir Economy Class vo Iberia uf Marokko is früsch eröffnete Hilton Hotel flüge u dert es paar Täg am Wasser eifach nume mau chly entspanne u abefahre.
Füre Colin u Yannick isch die nächsti Wuche o scho wieder die letzti Wuche vo ihrer Reis. Nach guet zwöiehaub Wuche Bali geits über Kuala Lumpur uf Singapur. Z Singapur wärde si no je e Nachtt im Marina Bay Sands und im Conrad Centennial verbringe, o da dörft dir öich uf früschi Reviews vo üsem Team fröie.
Drzue gits o nächst Wuche wieder viele spannendi News, interessanti Deals u neui Sache us dr Reisewäut!
