Hier geht’s zur Schriftdeutschen Version!
O die Wuche hets wieder spannends us dr Wäut vode Meile vode Pünkt und vo diverse Reise z brichte gäh. Mit viele neue News us dr Schwiiz, Europa und dr Wäut gits die Wuche e chlyne lengeri Zämefassig. Au das läset dr i üsem Wucherückblick!
D Highlights vor Wuche bi reisetopia ir Schwiiz
Bide News hets es wiuds Hin und Här rund um Eurowings gäh! Zersch hets gheisse das d Langstrecke komplett gstoptt wärde, kurz drufabe het d Muettergseuschaft zrügggruederet u het dr Wiiterbestand vode Langstreckine unger angerem Management akündiget.
O d Muetergseuschaft het mit es paar Akündigunge für Gsprächsstoff gsorget: näbemne neue outomatische Verfahre zur Handgepäckkontroue het d Airline neui Gebühre für d “Business Class Plus” i dä neue Maschine akündet.
Bide neue Business Class Produkt hets o Neuigkeite us Istanbul gäh! Es het die erschte ächte Biuder vor neue Dreamliner Business Class vor Türkische Airline gäh.
O vor Airbus hets zum A321neo Projekt diversi News gäh. Nachdäm American Airlines 50 Maschine vom Typ A321XLR bsteut het und o Qantas und Jetstar di europäische Extra-Langstreckenmaschine bsteut hei schiint ds Projekt richtig Fahrt ufznäh!
Dr vorhärig Ableger vom Projekt, d A321LR wird ab sofort öfters am Flughafe Z Basu z gseh sy. D Maschine verbindet ds Drüüländeregg mit Montreal in Kanada.
Usserdem nöii ider Schwiiz: Auch neu in der Schweiz: d Delta One Suite! Ab Dezember setzt die Amerikanischi Airline ufds neue Business Class Produkt uf dr Strecki vo New York id Schwiiz.
Ab 2020 fingt me z Züri es wiiters nöis Produkt. Mit dr Iifüehrig vor Boeing 777X, wo d Swiss und d Lufthansa söue übercho, wärde d Schwiizer e Premium Economy Class übercho. Wie z Produkt z Dütschland söu usgseh, het d Airline bereits vorgsteut.
Vo Edelweiss hets o zwöi wiiteri spannendi Theme gäh. D Ferie-Airline nimmt iz am TS PreProgramm teil! nimmt nun am TSA Pre Programm teil! Das bedütet: registrierti Reisendi chöi ab sofort viu eifach dürd Sicherheitskontroue ide Vereinigte Staate, o we si mit Edelwiis flüge. Bis hüt hetme das nume bir Swiss chönne. Es Ranking versuecht e chliny Rivalität zwüsche Edelweiss und dr Swiss ufzpushe: i dr neue Verspätigsstatistik ligt Edelweiss ufem erschte Platz, während d Swiss ufem 20. Platz z hingerscht uf dr Rangliste z finge isch. Mir hei d Gründ und d Erklärige für die Platzierige kritisch agluegt.
Zum Schluss vo üsne News heimer no e Tipp vor Linda: d Säntis Erläbniswäut het nöi ufdah u bietet beiidruckendi Erläbnis. Wär vor de Ferie nochly de aktuelle Temperature wott entcho, cha guet mau chly id Bärge!
Us dr Wäut vode Deals hets o spannends z brichte göh. Vorauem gits no hüt d Müglechkeit mit 50 Prozent Rabatt Fahrte bi Sixt Ride, em Limousinenservice z bueche!
Drzue hets no die neui Usgaab vode Meileschnäppli vo Singapore Airlines gäh, wo wieder Route nach Australie und zu diverse Ziu in Europa im Agebot hei. Wär lieber günstig Meile wott choufe, cha ds im Moment bi Wer lieber günstig Meilen kaufen möchte, kann das gerade bei Alaska Miles mache u drmit e guete Priis für d First Class in Asie erreiche!
Bide Reviews hets e Mischig us nah und fern gäh. Am Flughafe z Züri heimer öich nomau d Primeclass Lounge vorgsteut – die wou beschti Priority Pass Lounge am grösste Schwiizer Flughafe.
Dr Alex het zwöi Reviews us New York mit öich teilt: Ds enorm guete Millennium Hilton New York One UN Plaza, mitmne wunderbare Usblick, emene super leckere Zmorge und emene tolle Chundeservice.
Drzue hets o es Review vom Element am Times Square gäh, wo dr Alex aber us verschiedene Gründ nid het chönne überzüge.
O Iidrück us eire vode beschte Priority Pass Lounges in Dütschland heimer mit öich teiltt: d Hamburg Airport Lounge, mitmne geniale Usblick!
Die Wuche hets o spannendi Reiseaktivitäte i üsem Team gäh. Vor Economy- bis zur First Class isch aues derby gsy.
D Alexa und dr Alex heisech hüt ir Economy Class ir CRJ-900 vor Lufthansa ufe Wäg nach Münche gmacht. Vorem Abflug hets no fürne Abstecher id Lounge am EuroAirport glängt, wosi dank em Priority Pass Zuegang hei. Dr Alex isch bereits mit 14 verschiednige Flugzüg vode 35 vorhandene Maschine vor Canadair-Flotte gfloge. Mit däm Flug isch är mittlerwile bi 15 verschiedene Flugzüg aglangt.
Füre Fabian u sini bessere Heufti ischs die Wuche ir A330 First Class vor Swiss nach Tansania gange, wo e Wuche Kite und es paar Täg Safari uf die beide wartet.
Dr Luca gönnt sech chly früschi Luft ide Schwiizer Bärge. In Flumserberg (SG) isch er mit ca. 100 Chinder für rund zwöi Wuche imene Summerlager u gniesst bis denn die wunderbari Ussicht uf die siibe Churfirste.
Was Euch ir nächste Wuche erwartet
Nächst Wuche heimer wiiteri Reviews u Stories für euch vorbereitet. Ire neue Usgab vor Kategorie “booked” nimmt nech dr Alex mit i sini Planig füre Spätsummer. Drzue heimer es neus Review us Amsterdam vorbereitet und mir wärde vom verruckte Trip vom Colin ghöre wo quer dür Europa greist isch. Dr Alex isch nächst wuche zwar nid ganz normau aber doch relativ unspektakulär ungerwägs: Dank emene Termin in Basu geits mitem Zug wieder zrügg id Schwiiz, woner nachemne churze Ufenthaut wieder für churzi Ferie zu sire Schwöster uf Münche wird flüge. Dr Fabian erkundet wiiterhin dr afrikanisch Kontinänt, währenddäm die angere Teammitglieder ir Schwiiz Kurzusflüg wärde mache u derby wieder vieli spannendi Deals, Guides und Reviews für öich vorbereite!
