Do goht’s zu de schriftdüsche Version.

In däre vo enorme Wätterumschwüng zeichnete Wuche het’s einiges zum brichte gäh, sowohl bide News als au bi de Reiseaktivitäte vo unserem Team! D Zämefassig vode Wuche git’s in unserem neue, früsche reisetopia.ch Wucherückblick!

D Highlights vo de Wuche bi reisetopia in de Schwiz

In de Wält vo de Reise-News het sich in däre Wuche fast alles um de Airbus A380 dräiht! Nachdäm witeri Maschine vode Lufthansa nach Münche umzoge sind, sind au d Ziel bekannt gä worde. In de gliche Wuche isch au klar worde, dass Hi Fly, d Airline wo ei Airbus A380 nutzt um de Riesevogel situativ an anderi Airlines duet vermiete, e zweite Jet erwärbe will.

lufthansa airbus a380

Während die eine Airlines Jets umzieh düen, und anderi witteri A380 kaufe wänd, dänkt Air France in e komplett anderi Richtig: d Franzose versueche mit Airbus e Deal z erwirke, demit sie ihri A380 chönne los wärde. E andere grossi A380-Airline isch Emirates. D Golf-Airline het d Kooperation mit Marriott wider ufglegt und bietet so de Statusinhaber vo beidne Programm Vorteil bim andere Abieter.

Emirates Airbus A380

Absits vo de Riese-Jets git’s Änderige für Reisendi in Züri und die beide Lufthansa Dräihkrüz: d Lufthansa Group wird e neus Boarding-Prinzip ifüehre. Dodrmit söt bis zu 35% Zytersparnis erreicht wärde. Das trifft sich bsunders guet, will dr Flughafe Klote mit immer mehr “Stress-Dääg” rächnet: in däm Joor söt d Gränze vo 100’000 Passagier am Tag wäsentlich öfter briche wärde als im letschte oder vorletschte Joor. De Flughafe het drzue bekannt gä, wie Fluggäscht und Mitarbeiter probiere, s Chaos z minimiere.

ZurichAirport AerialView2

Wit absits vode Feriemasse het sich au bi de Privatjets öppis gänderet: die druf spezialisierti Firma vo Niki Lauda wird ab jetzt vomene Gänfer Management gfiehrt.

Us de Wält vo de Business Class git’s Neuigkeite vo Cathay Pacific. Mit neue Annähmlichkeite wie Matraze will die asiatischi Airline s scho guete Business Class Produkt witer ufwärte. De diräkti Konkurränt bi de Star Alliance, Singapore Airlines, het defür akündet, wie sie d Lounges am Heimatdräihkrüz verbessere und erneuere wänd.

New Singapore Airlines Lounge 2

Apropos Erneuerige: s Grunderneuerte Parisi Udvar Hotel in Budapest isch jetzt nur no bis am negschte Dsischtig mit nur 8’000 Pünkt buechbar, will drnoch wird s Hotel denn d Kategorie höcher wächsle und wird denn mindestens 20’000 Pünkt/Nacht koste. Das trifft sich enorm guet, will Hyatt het die Wuche au e neue Punkte-Sale gstartet, mit däm chöneder bis zu 40% Bonus beko und so enorm günstig Luxushotel wie das in Budapest bueche.

Parisi Udvar Budapest Unbound Collection By Hyatt Gebäude 5

Au bi de Choice Pünkt gits e Möglichkeit, Pünkt mitmene hoche Rabatt z kaufe, wo ihr denn für attraktivi Ilösige, wie zum Bispil in Skandinavie chönned nutze.

Clarion Collection Hotel Havnekontoret Bergen

Für alli Ferieläser, Schieler, Studänte und suschtigi Vielläser het de Volin au e spannends Agebot vorgstellt: 5fach Meile bi Orell Füssli!

Fliege für nur 2 Franke Stüüre und Gebühre? British Airways Executive Club het e neui Möglichkeit vonere neue Meileilösig vorgstellt, wo genau das innerhalb vo Europa ermöglicht. Wurum de Deal aber nid so wirklich guet isch, händ mir für Euch agluegt.

Ihr wänd alli Deals vo däre Wuche nomol läse? Denn lueged am beste uf unsere usfüehrliche Übersicht verby!

Vo de letschte Wuche han ich euch no s Review vo mim zweite Hotel in Budapest mitbrocht: s Hilton Garden Inn Budapest City Centre. E Hotel mitere guete Substanz, enere rächt guete Lag, aber mit grossem Schueligsufwand für d Mitarbeiter.

Hilton Garden Inn Budapest City Centre Aussenansicht 2

Hilton Garden Inn Budapest City Centre Zimmer 18

Passend zum Review us Budapest händ mir uns e komfortable Wäg zum dört ahne cho agluegt: die erschti Klass vom ÖBB Railjet.

railjet

Dezue hän mir für euch d Finnair Economy Class und d LATAM Business Class agluegt. Witter e Radisson Blu in de Republik Moldau und e Hotel in Rio de Janeiro.

radisson blu chisinau spa

Au in däre Wuche het’s viel vo de Reise us unserer reisetopia.ch Redaktion berichte z gäh!

Für d Alexa und mich het d Wuche in Münche mitme Kurztrip an Chiemsee agfange. Mitre Bootsfahrt uf em “Bayrischen Meer” händ mir d Hitz erträglicher gmacht.

Alexa Chiemsee Bayern See Boot Schiff

Denoch isch es mitem Auto widr fürs Erschte zruck nach Basel gange – so zumindescht dr Plan. Statt uns an dä z halte, isch es für mich spontan nach London gange und für d Alexa defür wider zruck zu de Familie nach Münche.

Am Fritigmorge isch es für mich für e Kurzusflug nach London gange. Do het sich eimol mehr zeigt, wie genial d Grössi vom Europairport si cha. Nur 17 Minute nach em Verloh vom Auto bin ich scho am Abfluggate nach London gstande. Komplett ohni Fast Track und mit Passkontrolle zur Usreis nach Grossbritannie – in Züri schafft me es in däre Zyt sälte au nur bis zur Sicherheitskontrolle. Nach em ereignislose Flug in die britischi Hauptstadt ha ich die überzügendi Business Lounge vo de oneworld Airline zum zMorge Ässe chönne benutze.

british airways galleries lounge london heathrow t5 modell

Dr eigentlichi Event, wieso ich nach London gfloge bi, isch den aber leider abgseit worde. So isches für mich denn in Concorde Room gange, eine vode exklusivschte Lounges m Flughafe Heathrow. Dört ha ich s Ässe dank Service am Platz mit mim Kolleg chöne gniesse.

London Concorde Room London British Airways 1London Concorde Room London British Airways 2London Concorde Room London British Airways 3

Do het sich widermol zeigt, wie e Status s Reise bequemer cha mache, will vom Chaos wäge divärse Problem händ mir fast nüt mitbeko. Nach 19 Stund han ich dene am Flughafe Basel widr in mi eigenigs Auto chöne istige und heimefahre – sehr mied aber um e Erfahrig richer.

Wenn au nid so chaotisch, isch au bi de Alexa alles glatt gloffe bide Heimreis mit em Zug. De gröschti Teil vo de Reis isch dank de diräkte Intercity-Verbindig zwische Basel Badische Bahnhof und em Hauptbahnhof vo Münche problemlos abgloffe. Denn aber het de öffentlichi Verkehr in Münche (leider wie gwohnt) komplett verseit und so isch es nach de dreifache Azahl an ursprünglich plante Umstieg au ändlich ins oberbayrische Erding gange. Dört het si s städtische Kulturfestival mit ussergwöhnliche Shops und Ässe erwartet.

Woche Bei Reisetopia Sinnflut Erding Alexa 2019

De Linda ihri Familie het kei Auto. Für d Reis an die französischi Atlantikküste isch dorum kurzerhand e Tesla gmietet worde. Für d Übernachtig uf halber Strecki hän sie sich fürs Novotel Clermont Ferrand entschiede. Überzüge het dört aber nur s zMorgebuffet chöne.

Linda Tesla Mietwagen Frankreich LadenNovotel Clermont Ferrand Zimmer

De Luca het de Grossteil vode Wuche in Berlin verbrocht. Dört hän dütlich agnähmeri Temperature als inde Schwiz gherrscht.

Waldorf Astoria Berlin Schlafzimmer Tower Suite

Die letschti Nacht im Hilton Berlin isch denn aber leider ähnlich prickelnd wie de Abflug vom überfüllte Flughafe Tegel gsi.

Was Euch in de nägschte Wuche erwartet

Nägscht Wuche git’s wider spannendi Guides und anderi früschi Artikel! Zum Bispil zeigt uns de Mirco wie me mit Avios extrem günstig durch Asie reise cha – inere aktualisierte Version vo Meilenmagie! Vo mir git’s e neui Usgob vo booked und drzue einiges an früscher Reise-News. Aber in de nägschte Wuche goht’s bi uns flissig witer mit Reise!

Für d Alexa gohts z’erscht emol für längeri Zyt nach Basel. Dört erwartet si Fründe, e Summerrodelbahn und s einte oder andere Kapitel usem Physikbuech. Für mich goht’s dene nomol spontan nach London – hoffentlich mit weniger Komplikatione als in däre Wuche. Ob no e kurze Trip nach Münche folgt wird sich denn spontan zeige, will e paar ruhigi Täg in de Schwiz wäre au e willkommeni Abwächslig. Für de Fabian goht’s über de Nationalfyrtag nach Nord-Italie, wo är e paar freii Täg in Belluno im Feriehuus vo de Familie vo de Fründin verbringt – ganz ohni Flugzüg und Hotel. Gringi Meileusbüti, hoche Relaxfaktor. Au das mues mol si. D Linda verbringt no die ganz Wuche in Hossegor ufem Surfbrätt und beim Yoga. Drzue gniesst si mit de Familie la vie en France.

Aber au für alli die wo keini Reise inde nägschte Wuche hän, git’s wider viel spannendi News, interessanti Guides und früschi Deals.

Autor



Fragen? In der reisetopia Club Lounge auf Facebook beantworten wir Eure Fragen.