Die erschti Wuchä im Juli het wieder spannendi Deals, viu News us der Schwiz und der Wäut vom Reisä botä. Au das hei mir für öich zämä gfasst i üsem Schwizer Wuchärückblick.
D Highlights vor Wuchä bi reisetopia i der Schwiz
Die Wuchä isch vo viunä Nöiigkeitä us der Lufthansa Group prägt gsi. Ds Grücht d’ Swiss überlegi sich ds Catering innerhalb vo Europa abdsschaffä hautet sich no immer hartnäckig. Positivi Nachrichtä gits ou zur Flottäernöiierig ds brichtä: D Lufthansa het chli töiferi Iblicke gwährt, weli Maschine bi welere Airline wärde cho und ga.
Usserdäm het d’ Lufthansa ä chli überraschend ä Kooperation mit Expedia bekannt gä. Dank derä wird d’ Reisebürogebühr vo 20 Frankä b Expediabuechigä zuekünftig entfauä. Aus der Welt vor Luftfahrt gits aber ou trurigi Nachrichtä: die Estnischi Airline Nordica het der Flugbetrieb igschteut.
Im Vorlouf vo dä Summerferie hets aber ä sehr positivi Mäudig vom EuroAirport in Basu gä. Der Flughafen het es umfassends Konzept vorgleit, wo ufzeigt, wie mä der Bsuecherasturm vo dä Ferientäg wott bewäutige. D’ Massnahmä si sehr personalintensiv und a viunä Steuä bemerkt mä d’ Verbesserigä scho.
I der Hotel-Wäut gits Neuigkeitä vo drü grossä Chöttinä: Hilton het es nöiis Waldorf Astoria in Los Cabos, wo bis itz aus ds beschtä Hotel vo Mexico gilt, Marriott het äs nöiis JW uf dä Maledivä und d’ Alila Ressort si itz über World of Hyatt abundä.
Alila Ressorts habt Ihr noch nie gehört? In Europa gibt es auch noch keine Häuser der Marke, was sich aber 2023 ändern wird. Dann folgt ein beeindruckendes Hotel in der Schweiz.
Äs Produkt wo i üsem reisetopia.ch Team immer grösseri Begeischterig überhungt si der Linda iri gliebtä Nachtzüg! D’ ÖBB, SBB und DB hei es gmeinsams Portau vorgschteut, wo ds Fingä und Buechä vo Reise uf em unübersichtlichä Nachtzugmarkt söu vereifachä.
Uf der Sitä vo dä Deals hets ou einiges gä ds brichtä! D’ Lufthansa All-In Deals si no hüt buechbar, ou wenn die Deals sich numä i dä wenigschtä Fäu lohne wärde. Mir hei aber ä attraktiverie Aktion von Holidaycheck für Sammler bim Eurowings Boomerang-Club gfunge. Hie chöit dir bis zu 2’000 Meilä sammlä.
Uf der Langstrecki hei mir die nöiiä Meiläschnäppli vo Lufthansa und ou Austrian für öich agluegt und die beschtä Ziel analysiert.
Für alli wo mit em Beatragä vo rä Miles & More Kreditcharte vo der Swisscard bis itz no hei gwartet, gits ä spannendi Aktion! 10’000 Meilä aus Wiukommensbonus bi aune Chartä. Das cha sich bsungers bi der Classic und der Guld Charte enorm lohnä.
Und mir hei no ä 20 Frankä Guetschin für alli Swiss-Flüg innerhalb vo Europa für öich gfungä. Bis am 12.7. cha mä dä Guetschin no ilösä.
Bi dä Reviews hets die Wuche ä bunti Mischig von Lounges von Hongkong über Oslo bis Amsterdam gä. Derzue hei mir äs Hotel in Singapur gneuer agluegt und ä wehmüätige Blick uf di gli abgschaffti Asiana First Class gworfä.
Dermit mir öich immer nöii Inhalte chöi bietä, isch üses Schwizer reisetopia Team ou die Wuchä wieder ungerwägs gsi.
Für d’ Alexa und der Alex isch es zersch mit dem dütschä ICE zrügg nach Basu gange, wo sie wieder einisch vo dä bekanntä Verspätige si betroffä gsi und iri Aschlusszüg darum nid hei verwütscht. Der ICE in Mannheim isch nä diräkt vor der Nasä wäg gfahrä und si hei es üaar schöni Bahnhöf in Baden Württemberg dörfä erläbä, wo mä normalerwis nid würd ahautä. Weniger ereignisrich isch es für die zwöi am Samschtig när mit der Lufthansa nach Münchä gangä. D D-ACKK isch für ä Alex da wieder ä nöii CRJ-900 gsi.
Der Colin isch am Samschtig nach Las Vegas gflogä, wo är ä Rundreis entlang vo dä verschiedenä Nationalparks schtartet. Derbi wird ds Abentür und ds erkundä vo dä wunderschönä Landschaftä im Vordergrund schtah, d’ Luxus- und Chöttihotels schtöh eher weniger uf em Programm.
Der Luca isch immer no i dä Bärgä und gniesst d’ Ussicht uf d’ Churfirschtä.
Dr Mirco isch sire Fitness z lieb chly id Bärge. Er het dr Wanderwäg ufe Niese unger d Füess gnoh woner durchus cha witerempfäläh.
Der Fabian isch uf em Rückwäg vo sirä Afrika-Reis und gniesst vor em Swiss First Class Flug no sini Zit i der Lounge ds Daressalam. Sini nöii Lieblings-Lounge wirds sicher nid.
Guet ds Wüssä, dass bereits nächschtä Monät ds nöiiä internationale Terminal 3 eröffnet. Denn chöi mir de ou uf nä Verbesserig vor Lounge hoffä.
Was öich i der nächschtä Wuche erwartet
I der nächschtä Wuche wärde mir öich mit em Mirco zämä uf sini Reis zum Mittelmeer schickä, i üsere nöiiä Usgab vo Reiseverruckt. Witer wartet uf öich äs spannends Review vo Alex sim Rückflug us Japan, mit ämä Produkt, wo er nid so schnäu wieder wird buechä. Usserdäm gits ä Guide zur Ilösig vo Hilton Honors Punkt vom Mirco, irä aktualisiertä Usgab vom Punkteparadies.
Aber ou bi dä Reisäaktivitätä nächscht Wuchä geits witer und blibt derbi spannend. Für d’ Alexa und der Alex geits zersch zrügg nach Basu und när für ds nächschtä Wuchäändi uf Budapescht. Ds dertigä Red Bull Air Race isch zwar a Bodäsee züglät, das het si aber nid vorä Erkundigung vor Stadt und ämä Kurztrip a Balaton mit em Outo ab! Us der ungarischä Houptstadt wärdä si Reviews vom nöiiä Hilton Garden Inn und äm Parisi Udvar us der Hyatt Unbound Collection mitbringä.
Für ä Colin wirds nächschti Wuche witergah uf sirä Reis durä Weschtä vo der USA. Der Schtart wird in Las Vegas si und ihn i Richtig Grand Canyon und Co. füährä.
I der kommende Wuche gits derzue no interessanti Guides, tolli Deals und spannendi News!
