Hier geht’s zur Schriftdeutschen Übersetzung
Die Wuche isch ganz im Zeichä vo Deals, Reviews und News gschtangä, wüu üses Team het für einisch d’ Täg numä i der Schwiiz gnossä. Derzuä hei mir äs nöiis Kolumne-Format gschtartet, wo sich d’ Linda und der Alex über näs Thema ustuschä. Was aues schpannends i der Wäut vo dä Deals und News passiert isch, läset dir i üsäm nöiiä Wuchärückblick!
D Highlights vo der Wuchä bi reisetopia i der Schwiiz
Mir si die Wuchä mit minä Idrück und dä guetä Nachrichtä vo der nöiiä Sicherheitskontrouä am Flughafe Münchä gschtartet. Uf das abä si Streikachündigungä us Frankrich u ds Grounding vo der Schwiizer Super Connie itroffe. D Nachrichtä vom Gwinnibruch bi der Swiss und em nöiiä Sitz bi Ethiad ohni Entertainment i der Economy Class hei diä zwöiti Heufti vor Wuche prägt. Die ernöiti Rümig vom Flughafä Basu wägä unbeufsichtigtä Gepäckschtück hei d News vo derä Arbeitswuchä abgrundet. Aber es het ou ä Liechtblick gä: Germania Schwiiz het ä Partner gfungä. Zämä wei si sich uf d Zuekunft vorbereite.
Ou bi dä Deals hets ziemläch viu ds brichtä gä: Näbä dä nöiiä Lufthansa Meiläschnäppli für ä Mai, het Miles&More ä Aktion für ä Chouf vo Wii gschtartet. Zuesätzläch gits ä nöii, attraktivi Promotion bi dä Hotels vor Intercontinental Gruppä. Ds nöiiä Hyatt Hotel in Budapescht laht säch enorm günschtig mit Pünkt la buächä, darum het d Alexa grad zuegschlage.
Usserdäm hei mir no witeri Agebot zum Meiläsammlä für öich zämägfasst.
Uf der Langstrecki gits günschtigi Swiss- und Lufthansa Sales ab London. Ds Agebot isch ä Partner Sale mit Priise, wos so äuä no nie het gäh. Ds zwöit chamä auso super günschtig nach Dubai oder ou Singapur flügä.
Dir weit aui Deals vo derä Wuchä nomau läsä? De lueget am beschte uf üsi usfüärhlächi Übersicht!
Derzue hei d Linda und ig über üsi Erfahrigä mit pääggende Ching im Flüger gredt. D Erkenntnis vor Linda isch, dass Vorbereitig und Entspannig d Lösig für die meischte Problem i däm Berich si. Mit der Sicht vom Viuflüger hei mir zwar sehr ungerschidlächi Wahrnähmigä, si üs aber einig, dass ou d Erziehig äs sehr wichtigs Thema vo derä Problematik isch. Mir fröiä üs sehr uf öii Meinigä und Erfahrigä i dä Kommentär.
Ou die Wuche hei mir öich wieder zu Idrück vo üsere Reis mitgnoh. Der Yannick het vo sim Flug i der Condor Economy Class vo Basu uf Dubai brichtät. Derzuä hets no zwöi Reviews vo mim Trip nach London gäh: Eis Hotel diräkt am London City Airport und d dnata Skyview Lounge ds Gänf, wo ig uf em Rückwäg ha bsuecht.
Das es ou i der Schwiiz cha schön si, zeigt üs die Wuche der Fabian. Zämä mit sirä Fründin isch är is Appizäu gfahrä, wo er zwar vom Schnee isch überrascht wordä, derfür aber im Reschtorant Truube äs erschtklassigs Znacht het chönnä gniässä.
Gnächtiget hei die beidä im schönä Gaschthus Bäre ds Gais.
Was öich i der nächschtä Wuche erwartet
I der nächschtä Wuchä schtöh wider meh Reisä a. Der Fabian brichtät vo sirä Reis quer dür Ägyptä und der Luca vo sim Flug i der Ethiopian Business Class. Der Yannick und der Colin flüge für nä Kurzusflug nach New York und für d Alexa und mi geits für näs Wuchänändi uf Münchä, das mau aber mit äm Zug und ganz ohni Lounges und Viuflügerstatus. Derzue nöii Guides, Reviews und viu meh!
