Au i dere Wuche häts wieder vieli interessanti News us dä Schwiiz, Europa und dä restliche Wält vom Reise geh. Natürlich sind däbi au wieder Reviews, Guides und Deals däbi gsi. I dem Wucherückblick fassed mir für üch nomal d Nachrichte us dä Luftfahrt und dä Hotellerie zämä,
D Highlights vode Wuche bi reisetopia ide Schwiiz
Diä letschte Täg chammä guät und gern als d Wuche vode Awards bezeichne: Zerscht hämmer über diä nüää Skytrax Awards brichtet, bi dene d Swiss First Class Lounge uszeichnet worde isch. Im gliche Atemzug hät d Qatar Awards i fascht allne Kategorie gsammlet. Däbi isch au no d Lufthansa First Class als beschti First Class vo Europa uszeichnet worde.
Imene andere Ranking isch d Swiss für diä besti Economy Class Europas prämiert worde – bi dem Ranking isch d British Airways als besti First Class küürt worde, was i üsere Redaktion no für grösseri Verwirrig gsorgt hät als d Uszeichnig fürd Lufthansa.
Us dä Schwiiz häts no d Verabschiedig vode Fokker 100 usem Dienscht vode Helvetic zu vermelde geh – d Flotte wird uf diä modernere E-Jets vo Embraer umgstellt.
Ungwohnt diräkti Wort hät d Swiss däfür gegenüber mögliche CO2-Bestüürige oder Ischränkige im Flugbetriebe gfunde – d Airline hät sogar in Ussicht gstellt, dass sie s Langstrecke-Drehchrüz inZüri i demfall ufgeh wänd. Glichziitig überleit sich Frankriich Flüg im Inland starch idsschränke – uf jede Falls spannendi Veränderige wo uf üs wartet.
Uf dä Langstrecki häts Nüüigkeite geh vo Turkish Airlines, wo ihri nüüi Business Class ide i ihrne Boeing 777 ibuuä werdet und so ä düütlichi Verbesserig vom Produkt erreichä wänd. Bi dä Emirates gits hingäge en nüüe Business Class Tarif ohne Lounge-Zuägang und andere Zuäsatzleischtige.
Und au bide Hotelprogramm gits en Ernüüerig! 34 nüüi Hotels sind übers Hyatt Privé Programm buächbar. Unter anderem au das nüä Hotel in Budapest wommer bald es Review uf reisetopia.ch becho werdet.
Ihr wänd alli Deals vo dere Wuche nomal läsä? Dänn luäged üch am beste diä usfüährlich Übersicht a
Zuäsätzlich hämmer natürlich au Guides und Reviews für üch gsammlet. S Highlight isch däbi en Tipp für alli Inhaber vo Bonviva Charte vode Credit Suisse: D Pünkt chönd ihr üch in zuäsätzlichi Miles&More Meile tusche.
Bevors näscht Wuche wieder Flugaktivitäte vom Team ds verzeichne git, isches diä Wuche relativ ruhig xi ade Reisefront.
Für dä Alex isches diä Wuche zerscht nach Züri gange, wonner reisetopia.ch ufere Verastalltig vode Reisebranche hät dörfe repräsentiere. Diräkt im Aschluss isches für ihn nach Münschter im schöne Westfahle gange – hi ide erste Klass vom düütsche ICE und zrugg im Schwiizer Eurocity inklusiv Panorama-Wage. 
Waser däbi am meischte vermisst hät: Dä guäti Handy-Empfang entlang vode Schwiizer Bahnstrecki. Im Zug schaffe ohni stabils Internet oder mindestens eme stabile Mobilfunknetz, stellt uf jede Fall en Useforderig dar!
Usblick
Ide kommende Wuche erwatet üch näbed einige spannende Guides und attraktive Ilösige bi Miles&More au en Erwiiterig vo üsem reisetopia Hotel-Programm! I dere Wuche gahts dänn au mit spannende Reise vom Team wiiter: Für mich gahts am Ziischtig vo Züri uf London City mit dä Swiss. Vo det us gahts dänn am Dunschtig ebenfalls mit dä Swiss über Züri ide First Class wiiter nach Daressalam (Tansania). Det wartet guät zäh Tag Ferie inklusiv Safari & Kitesurfä. Bide Alexa und em Alex gahts am Sunntig wiedermal mit dä Lufthansa nach Münche, wo dä Alex einigi Termin erwartet.
Däzuä händ mir natürlich vieli spannendi Reviews, Deals und Guides für üch am Start.
