Die Wuche hets bi reisetopia ir Schwiiz viu Nöis us dr wiite Wäut vom Reise u natürlech de einte oder angere Nöiigkeite us dr Schwiiz gäh. Näbst es paarne Mäudige vo Schwiizer Flughäfe heimer o vo Änderige vo Hotels ir Schwiiz brichtet. Was süsch no aus passiert isch, chöiter i üsem Wucherückblick läse!
D Highlights vor Wuche bi reisetopia ir Schweiz
Us dr Wäut vor Hotellerie gits spannends us Züri! Der het z Hotel Renaissance e neui Lobby und z naguneue CitizenM Hotel het eröffnet!
Ds Luxushotel Alex Lake het drfür uf die erste Wuche sit dr Eröffnig zrügggluegt u drby es durchwäg positivs Feedback zoge.
Aber o vom Flughafe Züri hets es Resümee gäh: D Pünktlechkeit blybt witerhiin es Problem wöus wieder meh verspäteti Flüg het gäh aus plant. Trotz auem hets o gueti Neuigkeite us Züri gäh. Dr Flughafe het trotz weniger Flüg e grösseri Mängi a transportierende Passagier chönne verzeichene.
Was die beide Airlines mit Hun z Züri ageit, hets die Wuche e spannende Zuefau gäh: sowou e Jet vor Swiss wie o eine vor Edelweiss si grad in Nordamerika am Bode u chöi nid wie plant uf Züri flüge. D Maschine or Swiss het Problem mitemne Fahrwärch u dr Edelweiss Flüger het e Parkschade.
Vor Edelweiss hets aber neui Nachrichte vor Linda gäh! Mit Schwiizer Spezialitäte imene neue Allergiker-fründleche Gwand wott d Airline ihri Spezialmenüs überarbeite. Mir si gspannt!
Vom Flughafe in Basu wo immer wieder mit Problem vo verlorene oder zrüggglassnigi Gepäckstück z kämpfe het, gits iz e Plan wieme die Sperrige i Zuekunft cha reduziere. Aber es git leider o negativi Nöiigkeite: nach nume emne haube Jahr wird TAP d Verbindig nach Basu scho wieder iisteue. D Alexa het sech angeri Wäg für uf Portugal z cho agluegt.
D Alexa het über zwöi Trends brichtet: Ds Reise mitem Hund u wasme derby mues beachte und die aktuelli Begeisterig für Wanderferie, nid nume im reisetopia.ch Team.
Vo üsne Nachbarländer heimer über Fiirlechkeite zum Jubiläum vom Fürstetum Liechtestei brichtet. Wiiteri Nachrichte usem Ussland hei dr Flughafe Münche, wo für vieli Schwiizer o sehr attraktiv gläge isch gliiferet: Eurowings und Lufhansa biete neui Streckine abem süddütsche Dräichrüz ah.
Us dr Wäut vode Deals hets die Wuche o spannendi Agebot gäh. Hie üsi persönleche Highlights:
3’000 Miles&More Meile gits im Moment dank ere Aktion bi Best Western! Usserdäm chöiter grad günstig Avios bi British Airways chofe – wäm auso nume no es paar Avios zum Ziu fähle söu da sicher zueschlah. Drzue heimer o dr passend Guide wie dir Pünkt vo Iberia zu British Airways u wieder zrügg chöit transferiere.
Dir weit aui Deals vo dere Wuche nomau läse? De lueget mau uf üsi usfüehrlechi Übersicht!
Bide Reviews heimer üs bsunders über Lucas Review vom Hilton Copacabana in Rio gfreut! Wär e churzwiiligi Lektüre suecht wird i däm sehr detaillierte und amüsante Review sicher fündig.
Bi üsne Reiseaktivitäte steit Asie vou im Mittupunkt: Füre Alex isches zwar zersch mau wäg vo Aise i dr sehr guete Business Class vo Air New Zealand gange.
Aschliessend heter chönne d Economy Class teste, dert isch är aus grosse Fan vo Wiiswii us Neuseeland nid entüscht worde!
Nach vier Nächt in Sydney ischs aschliessend imene bekannte Produkt nähmlech dr Singapore Airlines Business Class via Canberra u vo dert mitmne Nachtflug az Dräichrüz in Singapur wiiter gange.
Vo dert isches mitm neue Airbus A380 nach Shanghai gange. So heter dr diräkt Verglych zwüsche de beide aktuelle Business Class Produkt uf dr Langstrecki gha. Wie s aschliessend in Osaka isch wiiter gange verratet dr Alex im nächste Wucherückblick, ds würd dr Rahme hie schüsch spränge.
Aber o dr Yannick u dr Colin si ufem Wäg nach Asie! Für die zwöi ischs ir Swiss Business Class zersch mau uf Bangkok u vo dert ir Business Class vo Thai Airways wiiter nach Singapur gange. Dert heisi gnue Zyt gha fürne agnähmi Duschi ir Lounge u när dr letzt Flug uf Bali i Agriff z näh. Dasmau ir Singapore Business Class im A330. Au die Flüg heisi mit Meile buechet, gnauers drzue wärdet dir de i ihrem Tripreport erfahre.
Dr Fabian het am Friiti mitere Piper Cadet PA28 vor Flugschuel Birrfeld chönne go flüge. E Kolleg mit Piloteschiin het ihn und e witere Kolleg uf dä usFLUG iglade.Fabian konnte am Freitag mit einer Piper Cadet PA28 der Fliegerschule Birrfeld fliegen. Ein Freund mit Pilotenschein hat ihn und einen weiteren Kollegen zum AusFLUG eingeladen.
Vo Birrfeld ischs über z Bärner-Oberland nach Lausanne zum gmeinsame Lunch gange, u vo dert übere Jura wieder zrügg is Aargau.
Was Euch ir kommende Wuche erwartet
Ir nächste Wuche luege mr ah, wie dir müglechst eifach anes Upgrade bider Swiss chöit cho – mit diverse Optione für fasch jedi Klass. Zudäm steut üs dr Luca dr Companion Award vor, eine vode spannenste Vorteil vom Senator Status.
Aber o bide Reise gits wieder einiges z briichte: Füre Alex geits nächst wuche wieder zrügg uf Europa. Nach drü Nächt in Osaka geits no für zwöi Nächt uf Tokio bevor d Rückreis via Kairo uf Tunis geit.
Füre Yannick und em Colin geit d Reis in Asie wiiter. Die ersti wärde si i üsem Team bereits bestens bekannte Hilton Garden Inn Bali Airport verbringe. Uf Bali wärde si aber mehrheitlech aui Nächt i schöne Villene wosi via Airbnb hei buechet verbringe. Sie wärde Bali erkunde und öich mit schöne Biuder und zahlriiche Reviews versorge!
Am Donnschti geits füre Fabian – soferns de d Demonstratione zuelöh – mit dr Swiss vo Paris uf Hong Kong, woner e aute Schueufründ wird träffe. Drby isch o e Usflug nach Mainland China planet.
Für mi geits nächst Wuchenend einisch meh id Bärge. I wirde es paar Täg im wunderschöne Leukerbad verbringe u sicher z einte oder angere Foto sowie es Review usem Hotel mitbringe.
Drzue heimer öich vieli interessanti Deals und spannendi neui Guides!